荃灣遊

為左飲一杯金萱茶同酸辣米線，特登搭車去荃灣。兩個人都明顯有病，連店名同地址都唔記得（約莫知係千色店附近），心血來潮話去就去。萬一搵唔到點算呢？我問。傻人答“咪當郊遊囉！”

好心佢啦，以為荃灣真係新界啊？幾多隱形富豪住荃灣啊！港島住得耐就有呢個港島優越病！我在心裡小了他一輪。

到了千色店附近，找了個看起來像新移民的阿嬋問路。因為內地人大多數鍾意食辣。

我：請問你知唔知有間食酸辣米線好出名既鋪頭係邊度啊？

阿嬋：哦！係生果檔附近。

我：生果檔係邊度呢？

阿嬋：就係德華公園果度，轉入去就見架啦！

我：噢！唔該！仲有間飲台灣奶茶好出名的你知唔知係邊啊？叫咩名啊？

阿嬋：咩名就唔知，總之都係附近，好易搵啫！

完全西藏活佛搵轉世靈童feel。問完阿嬋，我們就以德華公園作起點，隨意地選了右面開始行…結果，行了幾步，就見到遠處有間掛滿紅膠燈的鋪頭。因為有番咁上下距離，睇唔到賣咩。傻人話會唔會就係果間賣生果既呢？我話掛咁多紅膠燈應該賣雞蛋喎！

行近一看，係生果檔！向右望，有人係度排隊啊！雲貴川！見到個名先記得！就係呢間啦！咁順利就搵到，好開心！

分別點了中辣和大辣酸辣米線，滿懷期待。我早帶定手巾，準備抹汗同鼻涕。米線上端上來，一看賣相，已經覺得唔多地道，一試，五花腩和湯底都帶甜味，又俾雜誌老點！又話好辣兼正宗，酸辣米線點會放花椒？就等於標榜京川滬的只係大雜燴，無樣正宗。呢間名為雲貴川的麵店，亦如此。要食辣，都係去深圳好。

雖然失望，但總算搵到，食完之後就搵金萱茶。天氣熱，飯氣又攻心，行得好慢，走入商場嘆冷氣。行左一陣，推門而出，正想問人之際，忽見有堆人站在外賣店外。一看，COME BUY！我的金萱茶！飲一啖，啊，係久違的台灣味道，絕對正宗。

食完去福來村行一圈，好滿足。